+  -  Çap 

“2023-cü il 19 sentyabr tarixində Azərbaycan Ordusunun Qarabağda lokal xarakterli antiterror tədbirləri həyata keçirməsini şərtləndirən bir neçə amillər vardır və həmin amillər Azərbaycanı buna məcbur etdi. Belə ki, İkinci Qarabağ Müharibəsinin başa çatmasını özündə ehtiva edən 2020-ci il 10 noyabr üçtərəfli bəyanatına əsasən erməni silahlı qüvvələri Qarabağdan çıxarılmalı idi. Ancaq 2023-cü ilə qədər Qarabağda erməni separatçı silahlı dəstələri hələ də fəaliyyət göstərirdi. Paralel olaraq müntəzəm şəkildə Azərbaycan ordusuna və mülki şəxslərə qarşı təxribatlar həyata keçirilirdi. 2023-cü ilin sentyabr ayının əvvəllərində Azərbaycan əsgərləri minalanma və atəşə tutulma hadisələri nəticəsində həlak oldu.

Həmçinin qanunsuz "Dağlıq Qarabağ Respublikası" adından qondarma prezident "seçkiləri"nin keçirilməsi də Azərbaycanı adekvat addımlar atmağa məcbur qoyurdu. Bu beynəlxalq hüquqa zidd idi və Azərbaycan suverenliyinə açıq-aşkar təhdid sayılırdı. Eyni zamanda Rusiya sülhməramlı kontingenti bölgədə yerləşdirilsə də, erməni silahlı dəstələrinin çıxarılması və təxribatların qarşısının alınması təmin olunmurdu. Bu da Azərbaycana öz suveren hüquqlarını bərpa etmək üçün hərbi əməliyyat keçirmək zərurəti yaradırdı.

Nəhayət, 19 sentyabrda səhər saatlarında Kəlbəcər və Laçın rayonlarında mina partlamaları nəticəsində 6 nəfər (4 polis və 2 mülki şəxs) həyatını itirdi. Bu hadisələr antiterror tədbirlərinə səbəb olan sonuncu damla oldu”.

Bu fikirləri Newscenter.az-a “Azərbaycanlıların və digər Türkdilli Xalqların Əməkdaşlıq Mərkəzi” ictimai birliyinin sədri İlham İsmayılov 19 sentyabr antiterror tədbirləri və onun nəticələrindən danışarkən səsləndirib. İctimai birlik sədri deyib ki, bu əməliyyatın əsas məqsədi bölgədə qeyri-qanuni erməni silahlı birləşmələrinin tərk-silah edilməsindən və Azərbaycanın suverenliyinin tam bərpasından ibarət idi:

“Əməliyyatlar yalnız hərbi obyektlərə və silahlı dəstələrə qarşı aparıldı, mülki şəxslərə zərər verilməməsi üçün dəqiq silahlar istifadə olundu. 24 saatdan az bir müddətdə Qarabağdakı separatçı ünsürlər ağ bayraq qaldıraraq təslim oldular”.

ATXƏM sədri deyib ki, antiterror tədbirləri ilə Azərbaycan qarsısına qoyduğu bir neçə məqsədə nail oldu: “Ən önəmlisi, Azərbaycan öz ərazisində tam suverenliyini bərpa etdi. Qarabağda qondarma qurumun mövcudluğu faktiki olaraq sona çatdı. Həmin ərazilərdə artıq yalnız Azərbaycan Konstitusiyası və qanunları qüvvədədir.

Əməliyyat nəticəsində Qarabağdakı qanunsuz erməni silahlı birləşmələri tərk-silah olundu, texnikaları və silah-sursatları təhvil verildi, mövqeləri ləğv edildi. Bu, bölgədə davamlı təhlükəsizliyin təmin olunması baxımından mühüm addım idi”.

İlham İsmayılov onu da deyib ki, antiterror tədbirləri ilə Azərbaycan daha bir ilkə imza atmış oldu. Onun sözlərinə görə, zərgər dəqiqliyi ilə baş tutan əməliyyat yalnız hərbi obyektlərə qarşı icra olundu, mülki şəxslər bundan ziyan görmədi:

“Azərbaycan rəsmiləri ilə yanaşı beynəlxalq müşahidəçilər də qeyd etdilər ki, əməliyyat yalnız hərbi obyektlərə qarşı yönəlmişdi. Mülki əhali və obyektlər hədəf alınmadı. Bu, Azərbaycanın hüquq çərçivəsində və beynəlxalq normalara uyğun hərəkət etdiyini göstərdi. Eyni zamanda antiterror tədbirləri çərçivəsində qeydə alınan ilklərdən idi ki, bu əməliyyat zamanı bir nəfər mülki şəxsin burnu belə qanamadı. Nəticədə Ermənistanın dəstəyi ilə 30 il ərzində Qarabağda mövcud olmuş separatçı idarəetmə qurumu ləğv edildi. Qondarma rejim özünü buraxdığını elan etdi. Bu, Azərbaycanın ərazi bütövlüyünün bərqərar olmasında son mərhələ idi. Bununla da sepatratizmə son qoyuldu”.

İlham İsmayılov sonda bunları qeyd edib:

“Əməliyyat göstərdi ki, Azərbaycan güclü və çevik orduya sahibdir. Eyni zamanda Ərazi bütövlüyü məsələsində qətiyyətlidir. Bütün addımlarını beynəlxalq hüquqa əsaslanaraq atır. Bu kimi gedişlər isə Bakının beynəlxalq səviyyədə mövqelərini gücləndirir.

Süleyman

newscenter.az