+  -  Çap 

İlham İsmayılov: “O medalı Mehdiyev deyil, bir başqası da təqdim etsə, mütləq çıxıb onu almalı idim”

Qəribə tendensiya yaranıb. Sabiq PA rəhbəri Ramiz Mehdiyev ətrafında baş verənlər fonunda birilərini qaralamaq, onu ləkələmək, yaxud şər-böhtan atmaqla nəsə əldə etmək üçün milli şəxslərə, dövlət və dövlətçiliyə bağlı olan insanlara da Mehdiyevçi damğası vurulur, həmin şəxslər barədə cəmiyyətdə mənfi rəy formalaşdırılmağa çalışılır. Mehdiyevçi damğası vurulanlar sırasında təkcə hansısa məmurlar, millət vəkilləri deyil, eyni zamanda media və QHT sektorunda fəaliyyət göstərənlər də var. İllər öncə, Mehdiyevin PA rəhbəri olduğu dönəmdə müxtəlif dövlət təltiflərinin verilməsi zamanı Ramiz Mehdiyevlə çəkilmiş fotoları tirajlayaraq guya həmin şəxslərin də sabiq PA rəhbərinin adamı olduğu barədə cəmiyyətə yalnış informasiya ötürülür. Bu günlərdə yerli media qurumlarından birində “Azərbaycanlıların və digər Türkdilli Xalqların Əməkdaşlıq Mərkəzi” (ATXƏM) ictimai birliyinin sədri İlham İsmayılovun da dövlət tədbirərindən birində Mehdiyevlə çəkilmiş fotosu yayımlanaraq onun da Ramiz Mehdiyevin himayəsində olan QHT rəhbəri olduğu iddia edilib.

Məsələ ilə bağlı fikirlərini Newscenter.az-a bölüşən ATXƏM sədri İlham İsmayılov sözügedən fotonun tarixçəsi barədə bunları deyib:

“Həmin şəkil Dünya Azərbaycanlılarının qurultayı zamanı çəkilib və diaspor fəaliyyətində xidmətlərə görə bir sıra diaspor nümayəndələri kimi məni də Cənab Prezident İlham Əliyev “Tərəqqi” medalı ilə təltif etmişdi. Medalın təqdim edilməsi anına qədər onun Ramiz Mehdiyev tərəfindən bizə veriləcəyini bilmirdim. Həmin təltifetmə zamanı məlum oldu ki, medalı Mehdiyev təqdim edəcək. Həmin tədbirdə Prezidentin keçmiş köməkçisi Əli Həsənov, YAP sədrinin müavini Əli Əhmədov, DİDK-nin keçmiş sədri Nazim İbrahimov da iştirak edirdi. Orada mənimlə bərabər müxtəlif ölkələrdə fəaliyyət göstərən diaspor nümayəndələrinə də medalları məhz Ramiz Mehdiyev təqdim edirdi. Onların məntiqi ilə desək o zaman həmin diaspor təmsilçiləri də Ramiz Mehdiyevin adamıdır? Tamamilə məntiqsiz yanaşmadır və yalnız cəmiyyətdə milli şəxsləri ləkələməyə hədəflənib”.

İlham İsmayılov deyib ki, o, Cənab Prezident tərəfindən göstərdiyi fəaliyyətə görə, təltif edilib və həmin medalı Mehdiyev və ya bir başqasının təqdim etməsinin heç bir qəbahəti yoxdur:

“Məgər medalı Mehdiyev təqdim edirdi deyə, biz ondan imtina etməli idik?. Mehdiyevə görə, biz haqq etdiyimiz mükafatdan imtina edəsi deyildik ki”.

ATXƏM sədri onu da deyib ki, həmin təqdimetmə zamanı hətta Mehdiyev onu tanımayıb və ondan kim olduğunu soruşub:

“Medalı təqdim edərkən Ramiz Mehdiyev məndən soruşdu ki, sən kimsən, harada çalışırsan. Çünki həmin medallar daha çox xarici ölkələrdə fəaliyyət göstərən diaspor təşkilatları rəhbərlərinə verilirdi. Mən də cavabında bildirdim ki, təşkilatımız Bakıda qeydiyyatda olsa da, lakin fəaliyyətimiz bütün Türk dünyasını əhatə edir və təşkilat olaraq Avropa ölkələrində Azərbaycan həqiqətlərinin dünya ictimaiyyətinə çatdırmaq üçün müxtəlif layihələr həyata keçirmişik. İndi bu gün həmin fotonu yaymaq o demək deyil ki, mən Ramiz Mehdiyevin adamıyam. Əksinə Ramiz Mehdiyev 2001-ci ildən məni qara siyahısına salıb. Bunu dəfələrlə açıq şəkildə bəyan etmişəm. Bəlkə də Mehdiyev mənim də təltif olunduğumu əvvəlcədən bilsə, mənə mane olardı ki, “Tərəqqi” medalını almayım. Bir sözlə mən həmin medalı gördüyüm işlərə görə Cənab Prezident tərəfindən verilən mükafat kimi qəbul edirəm. O medalı Mehdiyev deyil, bir başqası da təqdim etsə, mütləq çıxıb onu almalı idim. Çünki bu mükafat ölkənin birinci şəxsinin verdiyi mükafat idi”.

newscenter.az